ԱՐԱԲԿԻՐ 100 ցուցահանդես
Նոյեմբերի 27-ին Երևանի քաղաքի պատմության թանգարանում բացվեց «Արաբկիր-100» ցուցահանդեսը։
Ցուցահանդեսը կազմակերպվել է Երևանի պատմության թանգարանի, Հայաստանի Հանրապետության Ազգային արխիվի և Հայաստանի պատմության թանգարանի համագործակցությամբ։
«Արաբկիր-100»-ի նպատակն է ներկայացնել պատմական Արաբկիրի աշխարհը՝ մինչև ժամանակակից Երևանի Արաբկիր համայնքի ձևավորումը։ Ցուցադրությունը ընդգծում է այս համայնքի բացառիկ դերը հայկական ինքնության պահպանման և ազգային մշակույթի շարունակականության մեջ։
Ներկայացված լուսանկարները, փաստաթղթերը, ընտանեկան պատմությունները և կենցաղային առարկաները ցուցահանդեսին հաղորդում են յուրահատուկ ջերմություն ու վերապրված հիշողությունների ուժ։ Ցուցանմուշների զգալի մասը ներկայացվում է հանրությանը առաջին անգամ։
Ցուցահանդեսը ներկայացված է երեք հիմնական թեմատիկ բաժիններով․
Պատմական Արաբկիր – նրա տեղանքն ու միջավայրը, մարդիկ, հոգևոր-կրթական կյանքը, ինչպես նաև արաբկիրցիների մասնակցությունը Առաջինաշխարհամարտին։
Սփյուռքի արաբկիրցիներ – 1895–1896 թթ. համիդյան ջարդերից և 1915 թ. Մեծ եղեռնից հետո աշխարհով մեկ տարածված արաբկիրցիների կազմակերպությունները և հայապահպան գործունեությունը։
Երևանի ժամանակակից Արաբկիր – թաղամասի 100 տարվա պատմությունը՝ հիմնադրումից մինչև այսօր, համայնքային կյանքը և արաբկիրցիների ներդրումը Երևանի զարգացման մեջ։
Ողջույնի խոսքով հանդես եկավ Երևանի քաղաքի պատմության թանգարանի տնօրեն Գ. Օրբելյանը, ով ողջունեց հյուրերին և ընդգծեց նմանատիպ ցուցահանդեսների կարևորությունը քաղաքային հիշողության պահպանման, պատմական ժառանգության հանրայնացման և համայնքային ինքնության ներկայացման համատեքստում։
Ելույթ ունեցավ նաև Հայաստանի Հանրապետության Ազգային արխիվի տնօրենի տեղակալ Ա. Սիմոնյանը, ով կարևորեց համագործակցությունը և պատմական հիշողության վերականգնման գործում Արխիվի ունեցած մասնակցությունը։
Միջոցառմանը ողջույնի խոսք ուղղեց նաև ՀՀ ԳԱ Պատմության ինստիտուտի տնօրեն Ա. Մելքոնյանը, ամրագրելով ցուցահանդեսի նշանակությունը գիտական համայնքի համար։
Միջոցառման հուզիչ պահերից էր գրող Վահագն Դավթյանի դստեր ներկայությունը, ով իր խոսքով ընդգծեց Արաբկիրի և արաբկիրցիների տեղը իրենց ընտանիքի պատմության ու հիշողության մեջ։
