Երևանի գետնանցումների բարելավման ճանապարհը
Կ. Կոմենդարյանի նախագծի հիմնական դրույթները
2010-2011թ.
Նպատակը
Հեղինակը առաջարկում է Երևանի գետնանցումների մակերեսները զարդարել քաղաքին վերաբերող թեմատիկ պատկերներով: Նա համոզված է, որ այս տարբերակով ձևավորած գետնանցումները մի կողմից գրավիչ կլինեն քաղաքի բնակիչների և հյուրերի համար, իսկ մյուս կողմից կօգնեն բարձրացնել հասարակության գիտակցությունը և զերծ պահել անցումները քաղաքի ներկայացուցչական տեսքին խանգարող խզբզոցից, փակցված հայտարարություններից և անընդունելի գրաֆիտից:
Մտահղացման դրդապատճառները և նախապատմությունը
2010 թվականից սկսած՝ հեղինակը զարգացնում է իր մտահղացումը, թե ինչպես բարելավել Երևանի գետնանցումները հենց դասական և տեղին՝ ժամանակակից արվեստի միջոցով, առաջ բերելով «վարդագույն քաղաքի» գեղեցկությունը և ինքնությունը, նրա պատմությունը և արժեքները:
Մտահղացումը բխում է հեղինակի նախորդ առաջարկից՝ Էրեբունի-Երևան ամենամյա տոնակատարության շրջանակներում զարգացնել «Երևանի պատմության էջերը երեխաների աչքերով» մի նոր միջոցառում ևս: Նա առաջարկեց ավանդույթ դարձնելով իրականացնել մի միջոցառում. յուրաքանչյուր տարի ընտրելով քաղաքի պատմության մի էջ, համապատասխան վայրում արտապատկերել այն արվեստի միջոցով: Ընդլայնելով իր առաջարկը՝ հեղինակը նախատեսում է նաև բացօթյա արվեստի և պատմության վարպետաց դասերի կազմակերպում տարվա ցանկացած ժամանակ:
2010 թվականին հեղինակն իր մտահղացումը նախապես քննարկել է քաղաքի առաջատար գեղագիտական օջախների տնօրենների հետ, որոնք հետաքրքրություն են ցուցաբերել և տվել մասնակցության նախնական համաձայնություն: Մտահղացման մանրամասները հեղինակը ներկայացրել է քաղաքապետարան՝ պատրաստակամություն հայտնելով քննարկել այն համապատասխան ստորաբաժինների հետ և աջակցել դրա իրականացմանը: Արձագանքելով առաջարկին՝ քաղաքապետարանը գնահատեց այն դրական:
2011 թվականի ապրիլի 1-ին Հանրապետության հրապարակին հարակից գետնանցումում, տվյալ մտահղացման նման, քաղաքապետարանի աջակցությամբ իրականացավ քաղաքացիների մեկ այլ առաջարկ: Այդ օրը գեղարվեստի սաների ձեռքերով նշված գետնանցումը մաքրվեց և զարդարվեց աբստրակտ ժամանակակից և ֆուտուրիստական պատկերներով:
Առաջարկի էությունը
Ելնելով իր մտահղացումից՝ հեղինակը առաջարկում է՝
- գետնանցումների մակերեսներում արտացոլել հարակից տեղանքի պատմական տեսարանները, իրադարձությունները և այն ժամանակվա զգեստներով մարդկանց,
- հնարավորության դեպքում գետնանցումներում արտացոլել տվյալ տեղանքի նաև ժամանակակից պատկերները, իսկ գետնանցումների աստիճաններին հարող պատերին պատկերել դրսի տեսարաններն ուղեցույցների ձևով,
- կիրառել արվեստի այն տեսակները, որոնք չեն խանգարի գետնանցումների նախնական ձևավորմանը ու չեն թաքցնի քարե սալիկների մակերեսը և մակատեսքը (ֆակտուրան),
- հնարավորության դեպքում կիրառել եռաչափ ձևավորում:
Մտահղացման առավելությունները
Հաշվի առնելով վերոհիշյալը՝ հեղինակը ակնկալում է, որ՝
- երևանցիներին և քաղաքի հյուրերին կներկայացնեն հին Երևանի պատմական էջերը և տեսարանները,
- գետնանցումների ձևավորումները կունենան ուսուցողական և դաստիարակչական բնույթ,
- պատկերավոր ուղեցույցները կօգնեն անցորդներին ճիշտ կողմնորոշվել տեղանքի վերաբերյալ արդեն իսկ գետնանցումի ներսում:
Լրացուցիչ տեղեկություն
Գետնանցումների ձևավորման այս մոտեցումը ներկայացվել է քաղաքապետարան և ստացել դրական գնահատական նախորդ և ներկա գլխավոր դիզայներների կողմից, որոնք ցուցաբերել են հետաքրքրություն նախագծի իրականացման հանդեպ:
Տվյալ մտահղացումն առաջացավ հեղինակի ձեռնարկատիրական գործունեության ընթացքում, որի նպատակն է՝ մոտեցնել ձեռներեցների ձգտումները, հասարակության հետաքրքրությունները և հայկական պատմամշակութային արժեքների ճանաչումը:
Իր առաջարկը և դրույթները, գետնանցումների ձևավորման ներկայացված և մշակվող տարբերակները հեղինակը ճանաչում է որպես իր մտավոր աշխատանքի, սեփական միջոցների և ժամանակի սպառման արդյունք:
Նախագծին աջակցելու նպատակով ֆիզիկական և իրավաբանական անձինք իրենց հարցերը և առաջարկները կարող են ուղարկել հեղինակին հետևյալ էլեկտրոնային հասցեով՝ kkomend@hotmail.com: